Job 20

Sopara ena hereva iharuana: Tau dikadia edia noho namo be nega sisina sibona

1 Vadaeni Sopara, Namata tauna, be ia haere, ia gwau,

2 “Iobu e,
oiemu hereva ese lau idia hisihisi henia dainai,
lau ura haere henia haraga.
3 Oi gwauraia hereva ese lau idia hadikaia noho,
to lau ese idia lau haere henia diba.

4 “Nega gunadia dekena amo,
Dirava ese tanobada dekenai taunimanima ia atoa neganai,
ia mai bona harihari,
inai be oi diba lasi, a?
5 Kara dika tauna ena hekokoroku bona kwalimu,
be nega sisina sibona,
bona Dirava ia gari henia lasi tauna ena moale,
be ia doko haraga, ani?
6 Sedira ia be do ia tubu lata, ela bona guba,
bona iena kwarana be ori dekenai do ia kamokau.
7 To ia be do ia mase hanaihanai,
ia sibona ena kukuri bamona.
Idia itaia vadaeni taudia do idia gwau,
‘Ia be edeseni ia lao?’
8 Ia be do ia roho lao,
bona do ia boio, nihi do ia boio bamona,
bona tau ta ese do ia itaia lou lasi.
9 Guna ia noho gabuna dekenai do ia hedinarai lou lasi.
10 Bona ia ese ogogami taudia dekena amo ia henaoa kohu,
be iena natuna tau ese,
unai ogogami taudia dekenai do idia henia lou.
11 Unai tau ena tauanina be guna ia goada,
uhau tauna bamona,
to unai tauanina be, nega sisina,
mase ese tano kahu do ia halaoa.

12 “Momokani kara dika ena mamina be namo, iena uduna dekenai,
bona ia ese unai dika haida,
be iena malana ena henunai ia hunia noho.
13 Momokani ia ese unai dika ia ura henia noho dainai,
ia ura lasi do ia negea,
bona iena uduna dekenai ia dogoatao noho.
14 To unai aniani be iena bogana ia vareai neganai,
ena mamina be dika.
Ia be gaigai ena poisini bamona iena bogana lalonai.
15 Unai kara dika tauna ese,
ia henaoa vadaeni kohu momo do ia mumuta negea,
badina Dirava ese,
unai tau ena bogana dekena amo unai gau do ia abia lou.
16 Kara dika tauna ese ia ania gaudia,
be poisini bamona.
Unai poisini ese unai tau do ia alaia mase,
gaigai ese ia koria mase bamona.
17 Olive dehoro ena sinavai namodia do ia itaia lasi.
Rata bona hani idia heau noho sinavai,
be do ia moalelaia lasi.
18 Ia gaukara totona ahuna sisina be do ia abia lasi.
Iena hekwarahi ena davana bona ena moale,
be do ia davaria lasi.
19 Badina be ia ese ogogami taudia ia dagedage henidia vadaeni,
bona durua ta ia henidia lasi.
Ia ese danu idau tauna ese ia haginidia ruma haida,
be ia dogoatao kava.

20 “Unai tau ese sibona ia ura henia gaudia,
be ia tahua dikadika noho nega ibounai dainai,
laga-ani ia davaria diba lasi.
Unai dainai unai ia abia gaudia ese,
mauri namona idia henia lasi.
21 Ia aniani neganai,
iena aniani ibounai ia ania ore,
haida ia rakatania lasi,
unai dainai unai tau ena kohu momo,
be do idia noho daudau lasi.
22 Iena kohu momo idia noho neganai,
hekwarahi do ia vara,
bona lalohisihisi ena siahu ibounai,
be ia dekenai do ia ginidae.
23 Unai tau ese iena ura hegeregerena,
iena bogana do ia hahonua mai moale danu,
to Dirava ese iena kerere ena davana do ia henia,
mai badu bona siahu momokani danu.
24 Ia ese tuari kaia,
auri gauna dekena amo do ia heau neganai,
auri laboralabora diba ta do idia pidia,
bona unai tau do ia gwadaia momokani.
25 Iena doruna dekena amo idia ese diba do idia veria.
Diba ena matana be iena asena dekena amo do idia veria,
mai rarana momo danu.
Unai neganai mase ena gari ese,
unai tau do ia dogoatao momokani.
26 Ia ese ia haboua gaudia ibounai,
be dibura lalonai do idia boio ore,
bona taunimanima ese idia gabua lasi lahi ese,
unai tau,
bona iena ruma dekenai noho taudia ibounai danu,
do ia gabudia ore.
27 Guba ese unai tau ena kara kerere do ia hedinaraia,
bona tanobada ese, ia hadikaia totona do ia toreisi.
28 Iena ruma bona ena kohu ibounai,
be abata ese do ia kokia lao ore.
Dirava ese iena badu dinana dekenai,
unai bamona do ia karaia.
29 Kara dika tauna ena davana be unai,
Dirava dekena amo.
Iena ahuna be unai,
Dirava ese ia gwauraia vadaeni.”